शेरबहादुर गुरुङद्वारा विद्यालयलाई २४ रोपनी जग्गा निःशुल्क प्रदान 

पर्वत, १ जेठ : सामुदायिक विद्यालय सञ्चालनका लागि कि त सरकारी अनुदान कि त महायज्ञ वा अन्य कुनै कार्यक्रम गरेर पैसा सङ्कलन गर्ने प्रचलन छ ।

तर यहाँका एक वृद्धले भने आफ्नो गाउँमा सामुदायिक विद्यालय सञ्चालनका लागि पैतृक सम्पत्ति दान गर्नुभएको छ । पर्वत जिल्लाको महाशिला गाउँपालिका–६ फलामखानीका शेरबहादुर गुरुङले स्थानीय दुई विद्यालयको भौतिक पूर्वाधारलगायत दिगो आम्दानीका लागि आफ्नो २४ रोपनी जग्गा निःशुल्क प्रदान गर्नुभएको छ ।

गुरुङले जन्मगाउँमा रहेका दुई सामुदायिक विद्यालयका लागि आफ्नो सबै खेतबारी प्रदान गर्नुभयो । फलामखानी आधारभूत विद्यायलाई १० रोपनी र मदन आश्रित माध्यमिक विद्यालयलाई १४ रोपनी जग्गा प्रदान गर्नुभएको हो ।

जिल्लाको विकट गाउँमा रहेका यी विद्यालयमा गुणस्तरीय शिक्षा प्रदान गर्नका लागि आयआर्जन गर्न सकिने खालका फलफूल, जडीबुटी वा रुखबिरुवा र घाँस बिक्री गरेर आम्दानी गर्न सकुन् भनेर आफ्नो खेत, बारी र खरबारी तथा वनसमेत विद्यालयलाई हस्तान्तरण गरिएको उहाँले बताउनुभयो ।

हाल रूपन्देहीको मणिग्राममा बस्दै आउनुभएका जग्गादाता गुरुङले शिक्षा क्षेत्रको विकास भए मात्र समाज समृद्ध हुने ठानेर विद्यालयका लागि जग्गा प्रदान गरेको जानकारी दिनुभयो ।

पूर्व राष्ट्रियसभा सदस्यसमेत रहनुभएका गुरुङले आफू जन्मेका गाउँका विद्यालयमा गुणस्तरीय पढाइ सञ्चालन गरी स्थानीयवासीलाई गाउँमै बस्ने वातावरण सिर्जना होस् भनेर जग्गा प्रदान गरेको बताउनुभयो ।

यसैबीच विद्यालयलाई जग्गा र नगद उपलब्ध गराएको तथा गाउँको विकासमा महत्वपूर्ण भूमिका खेलेको भन्दै जग्गादाता गुरुङलाई दुवै विद्यालयले मङ्गलबार सम्मान पनि गरेका छन् । कार्यक्रममा दुवै विद्यालयका प्रधानाध्यापक र विद्यालय व्यवस्थापन समितिका अध्यक्षलाई गुरुङले जग्गाको लालपुर्जा हस्तान्तरण गर्नुभएको थियो ।
समाज सुधार गर्ने अभियानमा किशोरी    

पर्वतको पैंँयु गाउँपालिका–७ भोर्लेमा गठन भएको जनजागरण युवा महिला समूहका सदस्य साप्ताहिक रूपमा बैठक बस्छन् । वडाका बस्ती र टोलटोलमा पुगेर सरसफाइ गर्छन् ।

गाउँमा बालविवाह, महिला हिंसादेखि टोलबस्ती फोहर भएपछि समूहका सदस्य आफ्नो गाउँटोलमा भएका समस्या समाधानका लागि लागिपरेका छन् । भेला र बैठक तथा अभियानमा नआउनेलाई समूहका सदस्यले जरिवानासमेत तिराउने गरेका मात्रै छैनन् उठेको जरिवानाबाट डस्टबिन खरीद गरी टोलटोलमा वितरणसमेत गरिएको छ ।

नवजागरण युवा महिला समूहका सदस्य मात्रै होइन, पैँयु गाउँपालिका–६ सरौंखोलाको पैँयु युवा महिला समूहका सदस्यले पनि देउसीभैलो खेलेर आर्थिक सङ्कलन गरेर जम्मा भएको रकमले एक विद्यार्थीलाई विद्यालय पठाएका छन् । लामो समयदेखि विद्यालय जान छाडेर बसेकी बालिकाको उनीहरु सामूहिक रुपमा अभिभावक भएका छन् र स्टेशनरीदेखि पोशाकसम्म किनिदिएका छन् । “हामी पनि विद्यालय पढ्ने विद्यार्थी हौँ”, समूहकी सदस्य मुना चापागाई्रले भन्नुभयो, “खाजा खर्च कटाएर भए पनि केही सुधारका काम गरौँ भन्ने लाग्छ ।”

प्रतिक्रिया दिनुहोस्

ताजा

संग्रह (Archive)

Contact us
Address :
Durbarmarga, Kathmandu Nepal
Contact No:
9851155800, 9861155800
Email:
mediamissionnepal@gmail.com
info@mediamissionnews.com
DOIB Regd No.: 905/075/076
PAN: 606662442
OCR Regd No.: 193288/075/076
Run by Media Mission Nepal Pvt. Ltd.
About us
Chairperson/Editor-in-Chief:
Teknath Neupane
Editor:
Goma Bhandari
Managing Director:
Dr. Ganesh Prasad Acharya
© 2018 Mediamission
Designed By: Web House Nepal