भृकुटीमण्डपमा बृहत् तीज व्यापार मेला शुरु
काठमाडौँ, ७ भदौ : महिला उद्यमीले उत्पादन गरेका सामग्रीको प्रवद्र्धन गर्ने उद्देश्यले आजदेखि काठमाडौँको भृकुटीमण्डपस्थित प्रदर्शनी हलमा बृहत् तीज व्यापार मेला शुरु भएको छ ।
महिला सिर्जनशील केन्द्रद्वारा आयोजित उक्त मेला यही भदौ १० गतेसम्म सञ्चालन हुनेछ । झन्डै २०० बिक्री तथा प्रदर्शनी कक्ष राखिएको सो मेलामा एक लाखले अवलोकन गर्ने लक्ष्य आयोजकले लिएको छ ।
मेलामा अवलोकनकर्ताका लागि निःशुल्क स्वास्थ्य शिविर, फोटो खिचाउने, मेहेन्दी लगाउने र कपाल कटाइको सुविधासमेत रहेको केन्द्रका अध्यक्ष मिरू थापाले जानकारी दिनुभयो ।
मेलाको उद्घाटन गर्दै महिला, बालबालिका तथा ज्येष्ठ नागरिकमन्त्री थममाया थापाले ओझेलमा परेका उद्यमी महिलाहरुलाई बजारमा ल्याउने र उहाँहरुबाट उत्पादित सामग्रीहरु उपभोक्तासम्म पु¥याउनका लागि यस्ता मेलाले महत्वपूर्ण भूमिका निर्वाह गर्ने बताउनुभयो । यस प्रकारको मेला उपत्यका बाहिर पनि गर्नुपर्ने आवश्यकतामाथि जोड दिनुभयो ।
केन्द्रका अध्यक्ष मिरू थापाले महिला सिर्जनशीलता र उद्यमशीलतालाई प्रोत्साहन गर्न मेलाको अयोजना गरिएको बताउँदै मेलाबाट प्राप्त आम्दानीको ५० प्रतिशत सामाजिक सङ्घसंस्थालाई प्रदान गरिने धारणा व्यक्त गर्नुभयो ।
