अलपत्र १७९ जनाको उद्दार
काठमाडौँ, २४ माघ : मानव तस्करी गरी अलपत्र पारिएको आशङ्कामा भारतबाट १७९ जना नेपालीको उद्धार गरिएको छ । मुलुकका विभिन्न जिल्लाबाट वैदेशिक रोजगारको सिलसिलामा भारतको मनिपुरस्थित इनफाल पु¥याइएका ३२ पुरुष र १४७ महिलालाई उद्दार गरिएको प्रहरी प्रधान कार्यालय काठमाडौँले जनाएको छ ।
भारतीय प्रहरीको सहयोगमा नयाँ दिल्लीस्थित नेपाली राजदूतावासका काउन्सुलर (सहचरी) प्रहरी वरिष्ठ उपरीक्षक प्रकाश अधिकारीको टोलीले बुधबार उनीहरुको उद्दार भएको प्रहरीले आज जनाएको छ ।
उद्दार गरिएकालाई नेपाल ल्याउन प्रक्रिया शुरु गरिएको र सो विषयमा थप अनुसन्धान भैइरहेको प्रहरीले जनाएको छ । मनिपुरमा पहिलो यस्तो घटना भएको जानकारी दिँदै नेपाल प्रहरीका प्रवक्ता उत्तमराज सुवेदीले उनीहरुलाई नेपाल ल्याएपछि थप कारण खुल्ने बताउनुभयो । विशेष सूचनाको आधारमा प्रहरीले उनीहरुको उद्धार गरेको भन्दै सुवेदीले यसको बारेमा भारतका प्रहरीसँग समेत सूचना सङ्कलन गरिने जानकारी दिनुभयो ।
