मोदी र राजापाक्षबीच भेटवार्ता
कोलम्बो, २७ जेठ : भारतका प्रधानमन्त्री नरेन्द्र मोदी र श्रीलङ्काका विपक्षी दलका नेता तथा पूर्व राष्ट्रपति महेन्दा राजापाक्षेबीच भेटवार्ता भएको छ ।
प्रधानमन्त्री मोदीको औपचारिक भ्रमणका क्रममा उहाँहरुबीच आइतबार भेटवार्ता भएको अधिकारीहरुले जनाएका छन् ।
यसअघि प्रधानमन्त्री मोदीले श्रीलङ्काका राष्ट्रपति मैत्रीपाला सिरिसेनासँग दुई पक्षीय चासोका बारेमा छलफल गर्नुभएको थियो ।
भेटवार्तापछि मोदीले राष्ट्रपतिको कार्यालयमा राखिएको आगन्तुक पुस्तिकामा हस्ताक्षर गर्नुभएको सिरिसेनाको सचिवालयले जनाएको छ ।
राष्ट्रपति सिरिसेना विमस्टेक सदस्य राष्ट्रहरूको एक नेता पनि हुनुहुन्छ भने उहाँ केही दिन अगाडि भएको मोदीको सपथग्रहण समारोहमा सहभागी पनि हुनुभएको थियो । मोदीले प्रधानमन्त्रीकारूपमा दोस्रो कार्यकालका लागि सपथग्रहण गर्दा विमस्टेकका सदस्य राष्ट्रहरूलाई मात्रै आमन्त्रण गर्नुभएको थियो ।
उहाँको सपथग्रहण समारोह गत मे ३० तारिखका दिन भएको थियो । सपथग्रहणपछि पहिलो विदेश भ्रमणको रुपमा उहाँ माल्दिभ्स हुँदै श्रीलङ्का आइपुग्नुभएको हो ।
