८८ बर्षिय मलेसियाका पूर्वराजा अहमद शाहको निधन

क्वालालमपुर, ८ जेठ : मलेसियाका सातौँ राजा तथा प्रसिद्ध फुटबल खेलाडी सुल्तान अहमद शाहको बुधबार निधन भएको छ ।

उहाँको ८८ बर्षको उमेरमा निधन भएको अधिकारीहरुले पुष्टी गरेका छन् । पाहाङ राज्यबाट उहाँ केन्द्रीय राजा बन्नु भएको हो । पाहाङ राज्यको भने उहाँ पाँचौँ राजा हुनुहुन्थ्यो ।

देशका मुख्यमन्त्री वान रोस्डी वान स्माइलले वक्तव्य जारी गर्दै पूर्वराजाको निधन भएको जानकारी दिएको विभिन्न सञ्चारमाध्यमहरुले जनाएका छन् ।

राजधानी क्वालालमपुरमा रहेको राष्ट्रिय मुटु अस्पतालमा बुधबार बिहान उहाँको निधन भएको वक्तव्यमा उल्लेख गरिएको छ ।

सन् १९३० मा जन्मनु भएका अहमद शाह सन् १९७४ मा पाहाङ राज्यको राजा बन्नु भएको थियो भने सन् १९७९ देखि १९८४ सम्म पाँच वर्ष केन्द्रीय राजा बन्नु भएको थियो ।

मलेसियाका १३ प्रदेशमध्ये नौ प्रदेशमा छुट्टाछुट्टै राजा रहने र ती राजामध्ये पालैपालो केन्द्रीय राजा चुनिने व्यवस्था रहेको छ ।

उहाँलाई फुटबलमा अत्यन्त धेरै रुचि रहेको र फुटबल क्षेत्रमा उहाँको ठूलो योगदान रहेको भन्दै मलेसियामा उहाँलाई उच्च सम्मान गर्ने गरिएको छ ।

उहाँ झण्डै दुई दशकसम्म फुटबल सङ्घ मलेसियाको अध्यक्ष हुनु भएको थियो भने सन् १९९४ देखि २००२ सम्म एशियन फुटबल सङ्घको अध्यक्ष हुनुभएको थियो ।

मलेसियामा अहिले सुल्तान अब्दुल्ला अहमद शाह राजा हुनुभएको छ । निर्वाचित संवैधानिक राष्ट्रप्रमुखका रूपमा उहाँ मलेसियाको १६ औँ राजा बन्नु भएको हो । त्यसअघिका राजा सुल्तान मुहम्मद पाँचौँले जनवरी ६ मा राजीनामा दिएपछि उहाँलाई नयाँ राजा चयन गरिएको हो ।

मलेसियाका नौवटा राज्यबाट पालैपालो हरेक पाँच वर्षमा नयाँ राजा हुने प्रचलन रहे पनि यसअघिका राजाले समय पूरा नहुँदै व्यक्तिगत कारण देखाउँदै राजगद्दी परित्याग गर्नुभएको हो ।

बुधबार निधन भएका राजा सुल्तान अहमद शाहले ८८ वर्षको उमेरमा गत जनवरी ११ का दिन पद त्याग गरेपछि अहिलेका राजा अब्दुल्ला त्यस राज्यको सुल्तान बन्नुभएको थियो । त्यसपछि उहाँ केन्द्रको राजा बन्नु भएको हो ।

सन् १९५७ मा बेलायती उपनिवेशबाट स्वतन्त्र भएपछि यसरी छानिएका राजाहरू दैनिक प्रशासनिक काममा भने संलग्न हुँदैनन । उनीहरूले प्रधानमन्त्रीलगायत महत्वपूर्ण पदमा नियुक्ति गर्ने संवैधानिक व्यवस्था रहेको छ ।

मलेसियाका राजा इस्लाम धर्मका प्रमुख र सशस्त्र सुरक्षा निकायका पदेन प्रमुख हुने व्यवस्था छ भने अदालतबाट दोषी प्रमाणित भएका व्यक्तिलाई क्षमादान गर्ने अधिकार पनि राजासँग छ । राजाको मानहानी हुनेगरी आलोचना गर्नेलाई भने जेल सजाय पनि हुनसक्ने व्यवस्था छ ।

प्रतिक्रिया दिनुहोस्

ताजा

संग्रह (Archive)

Contact us
Address :
Durbarmarga, Kathmandu Nepal
Contact No:
9851155800, 9861155800
Email:
mediamissionnepal@gmail.com
info@mediamissionnews.com
DOIB Regd No.: 905/075/076
PAN: 606662442
OCR Regd No.: 193288/075/076
Run by Media Mission Nepal Pvt. Ltd.
About us
Chairperson/Editor-in-Chief:
Teknath Neupane
Editor:
Goma Bhandari
Managing Director:
Dr. Ganesh Prasad Acharya
© 2018 Mediamission
Designed By: Web House Nepal