कङ्गोको माछा बजारमा बन्दूकधारी समूहद्वारा आक्रमण हुँदा १९ व्यक्तिको मृत्यु
बुधबार स्थानीय माछा बजारमा भएको उक्त आक्रमणको कुनै समूहले जिम्मेवारी लिएको छैन तर आइतुरी प्रान्त वरपरको क्षेत्रमा यस अघि हेमा तथा लेन्दु समुदायका लडाकुबीच हिंसात्मक गतिविधि हुने गरेकाले यसमा पनि उनीहरूमध्ये एक (लेन्दु) लडाकूको सम्लग्नता रहेको हुनसक्ने स्थानीय अधिकारीले बताएका छन् ।
समुदायका एक स्थानीय राजनीतिकर्मी पिलो मुलिन्दोले भन्नुभयो, “आक्रमणपछि लेक अल्बर्टको तारा गाउँमा १९ जनाको मृत शरीर भेटिएको छ भने अन्य आठ जना घाइते अवस्थामा भेटिएका छन् ।” उहाँका अनुसार घाइतेमध्ये केहीको स्वास्थ्य अवस्था गम्भीर रहेकोले मृतक सङ्ख्या अझ बढ्न सक्ने बताइएको छ ।
शसस्त्र बन्दूकधारीको समूहले माछा लिएर बजारतर्फ जान लागेका समय आक्रमण गरेका बताइएको छ । उक्त स्थानमा अहिले राष्ट्रसंघीय सुरक्षा नियोगबाट खटिएका शान्ति सेना पठाउने तयारी भइरहेको बताइएको छ ।
उक्त स्थानमा गत बर्ष दुई समुदायबीच भएको झडपमा कम्तीमा १०० जनाको मृत्यु भएको थियो ।
लेक अल्बर्टको पारीपट्टी युगाण्डाको जमिनमा सो क्षेत्रबाट विस्थापित भएका करिब तीन लाख शरणार्थी शिविरमा बस्दै आएका छन् । माछा मार्न युगाण्डा क्षेत्रमा पुग्ने गरेको भन्दै कतिपय अवस्थामा युगाण्डाको तर्फबाट पनि माझीहरूमाथि आक्रमण हुने गरेको छ ।