‘पुटिन–किम भेट द्विपक्षीय सम्बन्ध विस्तार र कोरियाली प्रायद्वीप समस्यामा केन्द्रित रहने‘
मस्को, रूस, ६ वैशाख : रूसी राष्ट्रपति भ्लादिमिर पुटिन तथा उत्तर कोरियाका उच्च नेता किम जोङ–उनबीचको भेटवार्ता द्विपक्षीय सम्बन्ध विस्तार, क्षेत्रीय सहकार्य र कोरियाली प्रायदीपलाई आणविकरूपमा निशस्त्रीकरण गराउने बिषयमा केन्द्रित रहने रूसी प्रशासनिक केन्द्र क्रेमलिनले शुक्रबार जनाएको छ ।
क्रेम्लिनका प्रवक्ता दिमित्री पेश्कोभले सञ्चारकर्मीसँग भन्नुभयो, “छलफलका बिषयहरू धेरै बृहत् छन् । सर्वप्रथम यहाँ हामीले दुई छिमेकी मुलुकका प्रमुखबीच जोडिएका बृहत् सीमाका बिषयमा छलफल हुनेछ ।”
“रूसले कोरियाली प्रायद्वीपलाई आणविकरूपमा निशस्त्रीकरणका लागि आफ्नो पूर्ण क्षमताको प्रयोग गर्नेछ,” उहाँले बताउनुभयो ।
नेता किमले अप्रिलको अन्त्यसम्ममा रूस भ्रमण गर्नेबारे क्रेमलिनले बिहीबार जानकारी गराएको थियो । यो पुटिन र किमबीचको पहिलो औपचारिक भेटघाट हो ।
