बार्सिलोना, ६ पुस : क्याटलोनियाका पृथकतावादीले बार्सिलोनामा प्रदर्शन गर्न र सडक बन्द गर्न लागेपछि सरकारले उनीहरूसँग वार्ता गरेको छ ।
प्रधानमन्त्री पेड्रो सान्चेज नेतृत्वको मन्त्रिपरिषद्को टोलीले क्याटलोनीयामै उनीहरूसँग कडा सुरक्षाका बीचमा शुक्रबार वार्ता गरेको हो ।
साप्ताहिक रूपमा बस्ने मन्त्रिपरिषद् बैठक मड्रिडमा बस्ने गरेको थियो । तर सान्चेज नेतृत्वको छ महिना पुरानो समाजवादी सरकारले पृथकतावादीहरूको आन्दोलन अन्त्य गर्न क्याटलोनियामै मन्त्रिपरिषद् बैठक गर्ने निर्णय गरेको थियो ।
गत वर्ष भएको जनमत सङ्ग्रहले स्पेनबाट क्याटलोनियालाई छुट्याउने प्रयास असफल बनाएको थियो ।
पृथकतावादीले क्याटलोनियामा गठन गरेको सरकारका प्रमुख क्विम तोर्रा र सान्चेजले प्रभावकारी र अर्थपूर्ण वार्ताका लागि प्रतिबद्धता जनाउनुभएको छ ।
बिहीबार राति बार्सिलोनामा भएको वार्तामा उहाँहरूले वार्ताबाटै स्पेन र क्याटलोनियाको द्वन्द्वलाई समाधान गर्ने प्रतिबद्धता जनाउनुभएको हो ।
प्रदर्शनकारीले भने राजमार्ग र रेलमार्गहरू अवरुद्ध गरेका थिए भने क्याटलोनिया क्षेत्रीय संसद्मा जबरजस्ती प्रवेश गर्ने प्रयास पनि गरेका थिए ।
प्रदर्शनका समर्थकले पटक पटक ट्वीटरमा लेखेका थिए, “डिसेम्बर २१ का दिन हामी अनियन्त्रीत र असीमित हुनेछौँ ।”
