फिलिपिन्समा भएको झडपमा छको मृत्यु, २० घाइते
मनिला, २६ कात्तिक : फिलिपिन्समा सोमबार भएको भिडन्तमा परी कम्तीमा छ जनाको मृत्यु भएको छ ।
घटनामा परी अरु २० भन्दाबढी घाइते भएको प्रहरी अधिकारीले मङ्गलबार जानकारी दिएका छन् ।
फिलिपिन्सको सरकारी सुरक्षाकर्मी र विद्रोही समूहबीचमा पूर्वीसामर प्रान्तमा भीडन्त भएको बताइएको छ ।
स्थानीय समयअनुसार सोमबार बेलुकी ५ बजेतिर झण्डै ३० मिनेट झडप भएको अधिकारीले बताएका छन् ।
घटनाका बारेमा फिलिपिन्सको सेनाले भने अहिलेसम्म केही प्रतिक्रिया दिएको छैन । राष्ट्रपति रोड्रिगो डुटेर्तेले विद्रोही विरुद्धको कारबाही अझ शसक्त बनाउन निर्देशन दिनुभएको छ ।
फिलिपिन्समा सन् १९६९ देखि विद्रोह गर्दै आएको एनपिएलाई उहाँले सन् २०२२ सम्ममा अन्त्य गर्ने अठोट लिनुभएको छ ।
