सुडानी सैन्य शासक र आन्दोलनकारीबीचको वार्ता पछि स¥यो
खार्तुम, सुडान, ३ साउन : सुडानका सैन्य शासक र आन्दोलनकारीबीचको वार्ता पछि सरेको छ ।
शक्ति बाँडफाँडको विषयमा दुई पक्षकाबीचमा सहमति भएको भोलिपल्ट हुने तय भएको वार्ता अनिश्चित समयका लागि पछि सरेको एक नेताले शुक्रबार जानकारी दिएका छन् ।
“आन्दोलनकारी शक्तिहरूसँग हुने भनिएको वार्ता पछाडि सरेको छ,” सुडानी प्रभावशाली नेता ओमर अल डाइजरले एएफपीसँग भन्नुभयो ।
“संयुक्त दृष्टिकोण बनाउनुभन्दा पहिले हामीलाई अझ धेरै आन्तरिक छलफल र परामर्शको आवश्यकता देखिएको छ,” उहाँले थप्नुभयो । उहाँले वार्ताका लागि अर्को कुनै मिति तय भइनसकेको पनि जानकारी दिनुभयो ।
अर्का आन्दोलनकारी नेता सिद्धिग यौसेफले पनि वार्ता पछाडि सरेको पुष्टि गर्नुभयो ।
अहिले सैन्य सरकार रहेकोमा नागरिक—सैनिक संयुक्त सरकार बनाउने उद्धेश्यले दुई पक्षकाबीचमा बिहीबार मात्रै प्रारम्भिक “राजनीतिक घोषणा” भएको थियो ।
शुक्रबार हुने भनिएको वार्तामा दुई पक्षले विविध विषयलाई समेटेर ‘संवैधानिक घोषणा’लाई अन्तिमरूप दिने तयारी थियो ।
उनीहरुले आन्दोलनका क्रममा आन्दोलनकारीविरुद्ध भएको हिंसा, सङ्क्रमणकालीन संसदको गठन, सांसदहरूको भूमिकालगायतका विषयलाई पनि समेट्ने गृहकार्य गरेका छन् ।
सरकार विरुद्ध भएको आन्दोलनमा सहयोग गरेका तीन ओटा विद्रोही संगठनले भने बिहीबार भएको सम्झौताप्रति असन्तुष्टि जनाएका छन् ।
“असन्तुष्टमध्येको सुडान रिभोलुसनरी फ्रन्टसँग वार्ता गर्न म अदिस अबाबातर्फ जाँदैछु” डिजरले भन्नुभयो । अर्का नेता यौसेफले पनि विद्रोहीहरू खुशी नभएको बताउनुभयो ।
सुडानमा लामो समयदेखि भएको आन्दोलनपछि केही महिना अगाडि सैनिक सरकार गठन भएको छ भने आम नागरिकले सैनिक सरकार पनि अस्वीकार गर्दै नागरिक सरकार गठनको माग गर्दै आन्दोलन गरेका थिए ।
उनीहरूको आन्दोलनका कारण सैनिक सरकार र आन्दोलनकारीबीच समझदारी भएर संयुक्त सरकार बनाउने तयारी भएको बताइएको छ ।
