‘इएह छी हमर जनकपुर’ भिडियो सार्वजनिक
जनकपुरधाम, २६ असोज : बहुचर्चित मैथिली गीत ‘इएह छी हमर जनकपुर’ भिडियोको सार्वजनिक गरिएको छ ।
जनकपुरधामको सामाजिक, सांस्कृतिक र धार्मिक पक्ष समेटिएको इएह छी हमर जनकपुर (यही हो हाम्रो जनकपुर) गीतलाई जनकपुरको पहिचान मानिएको छ ।
प्रदेश नं २ को उद्योग, पर्यटन, वन तथा वातावरण मन्त्रालय र जनकपुरधाम उपमहानगरपालिकाको सहयोगमा नवरस प्रालिद्वारा सो भिडियो तयार गरिएको हो ।
सो अवसरमा उद्योग, पर्यटन, वन तथा वातावरणमन्त्री रामनरेश रायले जनकपुरधामको विशिष्टतालाई संसारभर पु¥याउन भिडियो सहायक हुने विश्वास व्यक्त गर्नुभयो । जनकपुरधामको महिमालाई मण्डित गराउन सबै पक्षको अग्रसरतामा जोड दिँदै उहाँले जनकपुरधामप्रति हुने गरेको नकारात्मक टिप्पणी, संशयको अन्त्य हुनु जरूरी भएको धारणा व्यक्त गर्नुभयो ।
सामाजिक विकास राज्यमन्त्री अभिराम शर्माले जनकपुरधामको इतिहास गौरवशाली रहेको तथ्यलाई भिडियोले प्रमाणित गरेको छ भन्नुभयो । जनकपुरधाम उपमहानगरपालिकाका प्रमुख लालकिशोर साहले ‘इएह छी हमर गीत’ले ऊर्जा प्रदान र मन हर्षित हुने गरेको बताउनुभयो ।
साहित्यकार रामभरोस कापडिले गीतले समाज र संस्कृतिलाई झल्काउनमा सफल भएको बताउनुभयो । नवरसका अध्यक्ष सुनिल मल्लिकले इएह छी हमर गीतमा जनकपुरधामको विशिष्टता र मनोभावलाई प्रस्तुत गरिएको धारणा राख्नुभयो ।
