ब्रुमरले सङ्कलन गरेको धुलो इँट्टा बनाउन दिइने
काठमाडौँ, ३ साउन : काठमाडौँ महानगरपालिकाले महानगरका सडकबाट सङ्कलन गरेको धुलोलाई इँट्टा बनाउन दिने भएको छ । महानगरभित्र यान्त्रिक कुचो (ब्रुमर) ले दैनिक सङ्कलन गर्ने फोहरलाई सदुपयोग गर्ने उद्देश्यले इँट्टा उत्पादन गर्ने कम्पनीलाई धुलो दिने योजना बनाइएको महानगरले जनाएको छ ।
यान्त्रिक कुच्चो शुरु भएदेखि अहिलेसम्म सो धुलो सडकका खाल्डा पुर्न वा पार्कमा सम्याउनका लागि प्रयोग हुँदै आएको थियो । त्यसका लागि नियमित धुलो नचाहिने हुँदा धुलोलाई इँट्टा बनाउन दिने योजना बनाइएको महानगरपालिकाका प्रवक्ता ईश्वरमान डङ्गोलले बताउनुभयो । सडकबाट सङ्कलन भएको धुलो इँट्टा बनाउनका लागि उपयुक्त हुने बताइएको छ ।
महानगरले सञ्चालन गरिरहेका सबै बु्रमरले दैनिक आठ टनसम्म धुलो सङ्कलन गर्ने गरेका छन् । यो फोहर अरु फोहरमा मिसाउने नगरिएको उहाँको भनाइ छ । उहाँले भन्नुभयो, “हामीले फोहरलाई सकेसम्म सदुप्रयोग गरेर कम परिमाणमा डम्पिङ साइडमा लैजाने योजना बनाइरहेका छौँ ।”
यान्त्रिक कुच्चो (ब्रुमर) ले धुलो बढारेर सफा गर्ने मात्रै नभएर त्यसलाई सङ्कलनको समेत काम गर्दै आएको प्रवक्ता डङ्गोलले बताउनुभयो । महानगरले पनि फोहरका कर्मचारी कम गर्दे जाने योजना बनाएको उहाँले बताउनुभयो । अहिले महानगर आफैँले खरीद गरेको पाँच र अनुदानमा प्राप्त दुईसहित सात वटा यान्त्रिक कुच्चो छन् । तिनले महानगरलाई धुलोरहित बनाइरहेको उहाँको भनाइ छ ।
सडकको धुलोसँगै घरबाट सडकसम्म फोहर आउनै नदिने योजना महानगरको छ ।
