नेकपाका प्रवक्ता श्रेष्ठ मेरिटाइम सिल्क एक्स्पोमा सहभागी हुने
काठमाडौँ, ६ कात्तिक : नेपाल कम्युनिष्ट पार्टी (नेकपा)का प्रवक्ता नारायणकाजी श्रेष्ठ चीनको गोन्जाओमा हुन लागेको ‘मेरिटाइम सिल्क रोड इन्टरनेशनल एक्स्पो’मा नेपाली प्रतिनिधिमण्डलको नेतृत्व गर्दै सहभागी हुनुहुने भएको छ ।
ग्वान्जाओस्थित बैयान अन्तर्राष्ट्रिय सम्मेलन केन्द्रमा यही कात्तिक ९ गते हुने ‘बेल्ट एण्ड रोड ग्रिन इण्डस्ट्रियल इन्ट्रिगेसन फोरम’ को उद्घाटन सत्रलाई उहाँले सम्बोधन गर्नुहुनेछ । सम्मेलनका क्रममा बेल्ट एण्ड रोड सहकार्यका संयन्त्र र पर्यावरणीय कृषि, विज्ञान तथा प्रविधि, वातावरण, नवऊर्जा तथा अन्य हरित उद्योग परियोजनाका बारेमा समेत छलफल हुनेछ ।
यही कात्तिक ८ देखि ११ गतेसम्म चल्ने सम्मेलनमा विभिन्न देशका सरकारका प्रतिनिधिले सम्बोधन गर्ने कार्यक्रम छ । सम्मेलनमा विभिन्न देशका १५० भन्दा बढी प्रतिनिधि तथा राष्ट्रिय समाचार समिति(रासस)का अध्यक्ष स्यामललगायत विभिन्न सञ्चारमाध्यमका सञ्चारकर्मीको सहभागिता रहनेछ ।
