उपत्यकामा ८६७ सहित थप ३०७५ जनामा कोरोना संक्रमण, २१२६ संक्रमणमुक्त
काठमाडौं, ३ भदौ : पछिल्लो २४ घण्टामा ३०७५ जनामा कोरोना संक्रमण पुष्टि भएको छ ।
११ हजार ९ सय ४६ पीसीआर परीक्षण गर्दा २ हजार ३२१ जना र ४ हजार ४९२ एन्टिजेन परीक्षण गर्दा ७ सय ५४ गरी ३ हजार ७५ जनामा कोरोना भाइरसको संक्रमण देखिएको स्वास्थ्य तथा जनसंख्या मन्त्रालयले जनाएको छ ।
संक्रमितमध्ये काठमाडौं उपत्यकामा ८६७ जनालाई संक्रमण देखिएको छ । काठमाडौंमा ६३९, भक्तपुरमा १०१ र ललितपुरमा १२७ जना संक्रमित थपिएका हुन् ।
पछिल्लो २४ घण्टामा २ हजार १२६ जना कोरोना संक्रमणबाट मुक्त भएका छन् । योसँगै नेपाल ६ लाख ९१ हजार २२९ जना संक्रमणमुक्त भएका छन् ।
मन्त्रालयका अनुसार हाल देशभर सक्रिय संक्रमितको संख्या ४० हजार ५सयजना रहेका छन् । जसमध्ये ३७ हजार ११४ जना होम आइसोलेसनमा रहेका छन् भने ३ हजार ३८३ जना संस्थागत आइसोलेसनमा रहेका छन् । कोरोनाका बिरामीमध्ये ७३९ जना आईसीयू र १६८ जना भेन्टिलेटरमा उपचाररत छन् ।
पछिल्लो २४ घण्टामा कोरोना संक्रमणबाट ३३ जनाको मृत्यु भएको छ ।
योसँगै नेपाल मृत्यु हुनेको संख्या १० हजार ४२९ पुगेको छ ।
