वीरमा ओपिडी बाहेकका सबै सेवा सञ्चालन
काठमाडौँ, २७ चैत : वीर अस्पतालका सबै चिकित्सक आन्दोलनमा रहे पनि अस्पतालले ओपिडी बाहेकका सम्पूर्ण सेवा सञ्चालन गरेको छ ।
अस्पतालले आकस्मिक सेवा सञ्चालन गरेको अस्पतालका निर्देशक डा केदारप्रसाद सेन्चुरीले जानकारी दिनुभयो । “आज ओपिडी सेवा पनि सञ्चालन गर्ने भनेर केही समय बिरामीको टिकट काटिए पनि चिकित्सकले आन्दोलन फिर्ता नलिएपछि प्रभावकारी रुपमा सेवा दिन सकिएन्”, उहाँले भन्नुभयो ।
चारसय ओपिडीका बिरामीको टिकट काटेपछि यहाँका चिकित्सकले आन्दोलन फिर्ता नलिएकोले पुनः बिरामीको टिकट बन्द गरिएको उहाँ बताउनुहुन्छ । उनीहरुलाई बाहिरै आन्दोलनरत् चिकित्सक र स्वास्थ्यकर्मी केन्द्रीय युनियनका चिकित्सकले सेवा दिएका थिए ।
सरकारले चिकित्सकहरुको मागलाई सम्बोधन नगरेपछि शुक्रबारदेखि उनीहरुले काम नगरी आन्दोलन शुरु गरेका थिए । आकस्मिकमा २५ प्रतिशत बढे बिरामी वीर अस्पतालमा आकस्मिकमा २५ प्रतिशत बिरामीको चाप बढेको छ । ओपिडी सेवा बन्द भएपछि आकस्मिकमा बिरामीको चाप बढेको हो ।
कूल ३५ श्ययाको क्षमता रहेको आकस्मिकमा दैनिक रुपमा १५० देखि २०० सम्म बिरामीले सेवा लिने गरेका थिए । तर ओपिडी सेवा बन्द भएपछि अहिले दैनिक रुपमा तीन सयसम्म बिरामीले सेवा लिने गरेका छन् ।
आकस्मिकमा बिरामीलाई राख्ने श्ययाको अभाव भएपछि ओपिडीका बिरामी राख्ने ठाउँमा आकस्मिकका बिरामी राखेर सेवा दिन थालेको निर्देशक सेन्चुरीले बताउनुभयो ।
