३२९ वर्ष पुरानो तलेजुको नगरा ताहा सत्तलमा
भक्तपुर, १० पुस : भक्तपुर नगरपालिकाले भक्तपुर दरबार स्क्वायर क्षेत्रस्थित तलेजु मन्दिर परिसरमा रहेको ३२९ वर्ष पुराना दुई ठूला नगरालाई सिद्धिलक्ष्मी मन्दिर अगाडिको ताहासत्तल (तबा सत्तल) मा आज पुनःस्थापना गरेको छ । नेपाल भ्रमण वर्ष २०२० का अवसरमा नगरपालिकाले मर्मतसम्भार गरी ती नगरालाई आज दरबार स्क्वायरमा कार्यक्रम आयोजना गरी ताहा सत्तलको पहिलो तल्लाको पश्चिमी भागमा पुनःस्थापना गरेको हो ।
कार्यक्रममा नगरपालिकाका प्रमुख सुनिल प्रजापतिले पुरानो नगराका विषयमा नयाँ पुस्तालाई थाहा दिन पहिलेकै ठाउँमा पुनःस्थापना गरिएको बताउनुभयो । राजा जितामित्रका पालामा तलेजु भवानीलाई चढाइएको नगरा पुनःस्थापना गर्नाका साथै सुरक्षित राखेर नगरा बजाउने व्यवस्था गरी यसलाई जीवन्तता प्रदान गर्ने योजना रहेको उहाँले बताउनुभयो ।
नगरपालिका उपप्रमुख रजनी जोशीले पुर्खाले छाडेको सम्पत्ति नयाँ पुस्तालाई हस्तान्तरण गरिएको बताउनुभयो । दरबार हेरचाह तथा संरक्षण कार्यालयका प्रमुख सरस्वती सिंहले लामो समयदेखि तलेजु परिसरमा रहेका नगरा विगतमा ताहा सत्तलमा राखिएको इतिहास भएको उल्लेख गर्दै आन्तरिक र बाह्य पर्यटकका लागि नगराका विषयमा जानकारी दिनु आवश्यक भएकामा जोड दिनुभयो ।
संस्कृतिविद् प्रा डा पुरुषोत्तमलोचन श्रेष्ठले धार्मिक र सांस्कृतिक जीवनको झलक दिने ऐतिहासिक नगराको महत्वबारे चर्चा गर्नुभयो । भक्तपुर ९ का वडाध्यक्ष रवीन्द्र ज्याख्वले भ्रमण वर्षका अवसरमा नगरपालिकाले यही पुस १५ गते सन्ध्याकालीन पदयात्रा र पुस १६ (जनवरी १) मा प्रभातफेरी कार्यक्रम गर्ने योजना रहेको जानकारी दिनुभयो । नेपाली सेनाको सहयोगमा नगरालाई ताहा फल्चामा पुनःस्थापना गरिएकोे थियो ।
