अन्तर–प्रदेश र अन्तरराष्ट्रिय उडान थप गरिने

काठमाडौँ, ९ मङ्सिर : संस्कृति, पर्यटन तथा नागरिक उड्डयनमन्त्री योगेशकुमार भट्टराईले नेपाल भ्रमण–२०२० लाई लक्षित गरी आन्तरिक र बाह्य उडान थप गर्न थालिएको बताउनुभएको छ ।

नेपाल भ्रमण वर्ष–२०२० मूल समारोह समितिको पाँचौँ बैठकलाई सम्बोधन गर्दै उहाँले भ्रमणमा पर्यटक सहजतका लागि अन्तरराष्ट्रिय र अन्तरप्रदेश उडान थप गर्न थालिएको बताउनुभयो । उहाँले अन्तर्राष्ट्रिय उडानका लागि अन्तर्राष्ट्रिय एयरलाइन्ससँग कुरासमेत भइरहेको जानकारी गराउनुभयो । ‘‘सङ्घीयताको अभ्यासलाई जोड्न र भ्रमण वर्षलाई लक्षित गरेर कुन–कुन प्रदेशबीच हवाई सञ्चालन गर्न सकिन्छ, त्यसबारे अध्ययन भइरहेको छ’’, उहाँले भन्नुभयो, ‘‘चाँडै नै अन्तरप्रदेश हवाई सञ्चालन गर्ने छौँ ।’’ उहाँले पर्यटन व्यवसायीका मागलाई ध्यानमा राखेर पर्यटनसँग सम्बन्धित नीतिलाई सहयोगी बनाइनेसमेत बताउनुभयो ।

मन्त्री भट्टराईले पर्यटन प्रवद्र्धनको लागि भौतिक पूर्वाधार आवश्यक रहेकाले सम्बन्धित मन्त्रालयले भ्रमण वर्षलाई सफल बनाउन भौतिक पूर्वाधारको विकास गर्नुपर्नेमा जोड दिदैं भ्रमण वर्षकै अवसरमा नयाँ हिमाल खुलाउने पहलसमेत भएको जानकारी दिनुभयो । उहाँले वैदेशिक रोजगार र अध्ययनका लागि जाने विद्यार्थीलाई भ्रमण वर्षको प्रचारप्रसारका लागि भ्रमण वर्षको लोगो अङ्कित टिसर्ट र टोपी दिएर पठाइनेसमेत बताउनुभयो । वैदेशिक रोजगार व्यवसायी सङ्घले वैदेशिक रोजगारमा जानेलाई र शैक्षिक परामर्श सङ्घले विद्यार्थीलाई टिसर्ट र टोपी दिएर पठाउनुपर्नेछ ।

‘‘विदेशमा जाने श्रमिकलाई रोजगारदाताका सञ्चालक र अध्ययन गर्ने जाने विद्यार्थीले आफू पढ्ने विश्वविद्यालय÷कलेजका सञ्चालकलाई भ्रमण वर्ष लोगो अङ्कित कुनै न कुनै उपहार दिन लगाउने छौँ’’, उहाँले भन्नुभयो, ‘‘डिसेम्बर १ तारिखबाट भ्रमण बर्ष अङ्कित लोगो वितरण गर्ने छाँै ।’’

सातै प्रदेशमा कार्यालय    

यसैगरी मन्त्री भट्टराईले बैठकको निर्णय सुनाउँदै सबै प्रदेशले भ्रमण वर्षलाई सहयोग हुने गरी कार्यालय स्थापना गर्ने जानकारी गराउनुभयो । एक हप्ताभित्र भ्रमण वर्ष सचिवालयलाई सहयोग गर्ने खालको कार्यालय स्थापना गर्ने निर्णय गरेको पनि उहाँले जानकारी दिनुभयो ।

भ्रमण वर्षको शुभारम्भ सातै प्रदेशबाट

नेपाल भ्रमण वर्षको शुभारम्भ काठमाडौँसँगै सातवटै प्रदेशबाट गरिने भएको छ । भ्रमणको शुभारम्भ जनवरी १ तारिखमा काठमाडौँस्थित दशरथ रङ्गशाला र सोही दिन सातवटै प्रदेशबाट पनि भ्रमणको शुभारम्भ गरिने भएको संस्कृति, पर्यटन तथा नागरिक उड्डयनमन्त्री योगेशकुमार भट्टराईले जानकारी दिनुभयो ।

कार्यक्रममा सुदूरपश्चिम प्रदेशका मुख्यमन्त्री त्रिलोचन भट्टले भ्रमण वर्ष सफल बनाउन आफ्नो प्रदेशले सक्दो सहयोग गर्ने बताउनुभयो । ‘‘हामी पनि हाम्रो प्रदेशमा भएका पर्यटकीय क्षेत्रको प्रचारप्रसार गरेर पर्यटकलाई आफ्नो प्रदेशमा ल्याउने छाँै’’, उहाँले भन्नुभयो, ‘‘सङ्घले पनि भ्रमण वर्षलाई सफल बनाउनका लागि प्रदेश सरकारसँग समन्वय गर्नुपर्छ ।’’

कार्यक्रममा प्रदेश नं ३ का उद्योग, पर्यटन वन तथा वातावरणमन्त्री अरुणप्रसाद नेपालले पर्यटनसँग सम्बन्धित कार्यक्रम आफूहरुले सञ्चालन गरिसकेको भन्दै भ्रमण वर्ष लक्षित कार्यक्रम सङ्घ सरकारको समन्वयमा गरिने बताउनुभयो । कर्णाली प्रदेशका पर्यटनमन्त्री नन्दसिंह बुढाले कर्णाली प्रदेशमा पर्यटक बढाउनका आकर्षित गरिरहेको बताउनुभयो ।

कार्यक्रममा गृहसचिव प्रेमकुमार राईले भ्रमण वर्ष सफल पार्नका लागि भौतिक पूर्वाधार विकासमा जोड दिनुपर्ने बताउनुभयो । अध्यागमन विभागका महानिर्देशक ईश्वरराज पौडेलले अन्तरराष्ट्रिय उडान अवतरण हुनुभन्दा अगाडि दुई मिनेट भ्रमण वर्षबारे जिङ्गल बनाइने तयारी गरिएको बताउनुभयो ।

प्रधानसेनापति पूर्णचन्द्र थापाले नेपाली सेनाले भ्रमणलाई लक्ष्य गरेर आठ कार्यक्रम सञ्चालन गर्ने जानकारी दिनुभयो । प्रहरी महानिरीक्षक सर्वेन्द्र खनालले भ्रमण वर्षमा सुरक्षालाई मजबुत गरिने बताउनुभयो । गैरनेपाली आवासीय सङ्घका अध्यक्ष कुमार पन्तले भ्रमण वर्षको अवसरमा डिसेम्बर ३१ र जनवरी १ तारिखमा ८३ देशमा साइकल र कार ¥याली गरिने जानकारी दिनुभयो । नेपाल उद्योग वाणिज्य महासङ्घका वरिष्ठ उपाध्यक्ष शेखर गोल्छाले भ्रमण वर्ष सफल बनाउन निजी क्षेत्र लागिरहेको बताउनुभयो ।

कार्यक्रममा भ्रमण वर्ष सचिवालयका संयोजक सुरज वैद्यले सबै नेपालीलाई भ्रमण वर्षमा आबद्ध गराइने बताउनुभयो । उहाँले प्रदेश र स्थानीय तहसँग समन्वय गरेर भ्रमणका कार्यक्रम तय गरिने समेत जानकारी दिनुभयो । उहाँले सबै नेपालीलाई प्रतिबद्धता गराएर नेपाल घुम्न आग्रह गरिने बताउनुभयो । ‘‘नेपालको खाली नक्शामा आफू कहाँ जाने भनेर सबैलाई हस्ताक्षर गरेर भर्न लगाउछौँ’’, उहाँले भन्नुभयो, ‘‘अनि प्रतिबद्धता गरेअनुसारका ठाउँमा घुम्न आग्रह गर्छौँ ।’’