महिला फूटबलको उपाधि प्रिन्ट मिडियालाई

नेपाल पत्रकार महासंघ महिला विभागद्वारा आयोजित महिला फूटबल प्रतियोगिताको उपाधि प्रिन्ट मिडियाले जितेको छ ।

‘महिला पत्रकार कोषका लागि एक गोल’ भन्ने नाराका साथ सातदोबाटोस्थित एन्फा मैदानमा भएको प्रतियोगितामा अनलाइन मिडियालाई २–१ गोलले पराजित गर्दै प्रिन्ट मिडियाले उपाधि जितेको हो । खेल जारी रहेकै बेला रात परेपछि खेल बीचमै रोकेर पेनाल्टीमार्फत विजेता घोषित गरिएको थियो ।

विजेता टोली प्रिन्टका लागि पूण्यवती ढकाल र भाषा शर्माले गोल गरेका थिए भने अनलाइनका तर्फबाट मुना कार्कीले मात्र गोल गर्न सकिन्, अन्य खेलाडीले हानेको पेनाल्टीले गोलपोष्टको दिशा लिन सकेन ।

प्रतियोगितामा रेडियो र टेलिभिजनले संयुक्तरुपमा तेस्रो स्थान प्राप्त गरे । निर्धारित २० मिनेटको खेलमा दुवै टोलीले गोल गर्न नसकेपछि दुवै टोलीलाई तेस्रो भएको घोषणा गरिएको थियो ।

विजेता टोली रेडियोलाई १–० गोलले र उपविजेता अनलाइन टोली टेलिभिजनलाई २–१ ले पराजित गरी फाइनलमा पुगेका थिए ।

विजेता तथा उपविजेता टोलीलाई नेपाल पत्रकार महासंघका उपाध्यक्ष विपुल पोखरेल, महासचिव रमेश विष्ट, सचिव रामप्रसाद दाहाललगायतले ट्रफी प्रदान गर्नुभयो ।

यसअघि प्रतियोगिताको उद्घाटन गर्दै युवा तथा खेलकूदमन्त्री जगतबहादुर सुनार (विश्वकर्मा)ले खेलकूद क्षेत्रका समस्याबारे पत्रकारहरूले आ–आफ्नो मिडियाबाट खबरदारी गर्न आग्रह गर्नुभयो ।

खेलकूदको क्षेत्रबाट मुलुकको समृद्धि गर्न सकिने बताउँदै उहाँले नेपालमा अन्तर्राष्ट्रियस्तरका खेल मैदान निर्मााण थालिने बताउनुभयो । सो अवसरमा उहाँले विजेता टोलीले प्राप्त गर्ने गरी प्रोत्सहानस्वरुप रु १० हजार महासंघका कोषाध्यक्ष राजेश मिश्रलाई हस्तान्तरण गर्नुभयो ।

प्रतिक्रिया दिनुहोस्

ताजा

संग्रह (Archive)

© Copyright @ Media Mission Nepal Pvt. Ltd. 2018-2024. All Rights Reserved.