रहेनन् पूर्वमन्त्री कुबेर शर्मा
काठमाडौं, १५ फागुन : पूर्वमन्त्री कुबेर शर्माको निधन भएको छ ।
नेपालका पहिलो चार्टर्ड एकाउन्टेन्ट (सिए), पूर्वमन्त्री कुबेरप्रसाद शर्माको निधन भएको छ । उपचारको क्रममा शुक्रबार साँझ ५ बजेतिर मेडिसिटी अस्पताल काठमाडौंमा ८१ वर्षीय शर्माकाे निधन भएको हाे ।
सप्तरीकाे राजगढ गाउँपालिकास्थित नर्घो टोलका शर्माले २०४८ सालमा निर्वाचन क्षेत्र नम्बर ४ बाट प्रतिनिधिसभा चुनाव जितेका थिए । पछि उनी पर्यटनमन्त्री पनि बने ।
२००७ साल हुँदै प्रजातन्त्रिक आन्दोलनमा सहभागी उनी २०४६–०४७ सालको जनआन्दोलनमा सप्तरीबाट सक्रिय थिए । २०५३ सालपछि कांग्रेस पार्टी छाडेर उनले हरियाली नेपाल पार्टी खाेलेका थिए । उनी इच्छामृत्युलाई कानुनी मान्यता दिन माग गर्दै अभियान चलाएको व्यक्ति पनि हुन् ।
नेपाली कांग्रेसका नेता तथा पूर्वसांसद शर्मा पूर्वप्रधानमन्त्री कृष्णप्रसाद भट्टराई निकट नेता थिए । पछिल्लो कालखण्डमा हरियाली पार्टी स्थापना गरेर चर्चामा आएका शर्मा प्रख्यात चार्टर्ड एकाउन्टेन्टका रूपमा समेत चिनिन्थे ।
शर्मा विगत केही वर्षयता अस्वस्थताका कारण सार्वजनिक जीवनबाट टाढा रहँदै आएका थिए ।
उनका ३ जना छोरी छन् । उनको अन्तिम संस्कार शनिबार गरिने परिवारले जनाएको छ ।
