बंगलादेशसँग नेपालको बराबरी
काठमाडौं, २ मंसिर : बंगलादेशसँगको अन्तर्राष्ट्रिय मैत्रीपूर्ण दोस्रो खेलमा नेपाल बराबरीमा रोकिएको छ । ढाकास्थित बंगबन्धु रंगशालामा भएको खेलमा नेपाल घरेलु टोलीसँग गोलरहित बराबरीमा रोकिएको हो ।
योसँगै मुजिब वर्ष फिफा अन्तर्राष्ट्रिय मैत्रीपूर्ण सिरिजको उपाधि बंगलादेशले जितेको छ । यसअघि सिरिजको पहिलो खेलको जितेको घरेलु टोलीले मुजिब वर्ष फिफा अन्तर्राष्ट्रिय मैत्रीपूर्ण खेलको उपाधि पनि जितेको हो ।
बंगलादेशविरुद्ध निकै आक्रामक खेल खेले पनि नेपालले गोल गर्न सकेन् ।
खेल अवधि भर नेपालका अग्रपंक्तिका खेलाडी डरलाग्दो आक्रमण बनाउनबाट चुकेका थिए ।
तर, खेलको इन्जुरी समयमा नवयुग श्रेष्ठको हेड प्रहार पोस्टमा लागेर फर्किएको थियो ।
रजिन धिमालको क्रसमा नवयुगको उत्कृष्ट हेडर पोस्टमा लागेर फर्कदा नेपाल जित निकाल्नबाट बन्चित भयो ।
यस्तै बंगलादेशविरुद्ध नेपालका छिरिङ गुरुङ, पुजन उपरकोटी र सेसेहाङ आङ्देम्बेले डेब्यु गरे ।
रक्षात्मक खेल्दै काउन्टर अट्याकमा जोड दिएको बंगलादेशले पनि उत्कृष्ट आक्रमण गर्न सकेन ।
यस बराबरीसँगै ‘मुजिब वर्ष फिफा अन्तराष्ट्रिय फुटबल सिरिज’ बंगलादेशले जितेको छ ।
बंगलादेशले दुई खेलको सिरिजमा एक जित र एक बराबरी खेल्दै सिरिजमा कब्जा जमाएको हो ।
शुक्रबार भएको पहिलो मैत्रीपूर्णमा बंगलादेशले नेपाललाई २-० ले हराएको थियो ।
फिफा विश्वकप छनोटको दोस्रो चरण खेलिरहेको नेपालले तयारीका लागि बंगलादेशसँग दुई मैत्रीपूर्ण खेल खेलेको हो ।
खेलमा पहिलोपटक सिनियर टोलीमा परेका डिफेन्डर छिरिङले पहिलो रोजाइमा पर्दै राष्ट्रिय टोलीमा डेब्यु गरेका छन् । नेपालका लागि विभिन्न उमेर समूहमा खेलिसकेका उनी घरेलु लिग च्यासल युवा क्लबबाट खेल्दै आएका छन् ।
त्यस्तै पूजन उपरकोटी र सेसेहाङ आङडेम्बेले राष्ट्रिय टोलीमा डेब्यु गरेका थिए । पूजन दोस्रो हाफमा तेज तामाङको स्थानमा मैदान प्रवेश गर्दै डेब्यु गरेका थिए । त्यस्तै सेसेहाङले ७२औं मिनेटमा डेब्यु गरे । उनले विकास खवासको स्थानमा मैदान प्रवेश गर्दै राष्ट्रिय टोलीमा डेब्यु गरेका थिए ।
