भार्डीको दुई गोलमा लेस्टरको जित, एभरटनले टोटनहमलाई हरायो
काठमाडौं, २९ भदौ : प्रिमियर लिग अन्तर्गत गएराति भएको खेलमा लेस्टर सिटी र एभरटनले जित हात पारेका छन् ।
जेमी भार्डीले दुई गोल गरेपछि लेस्टरले वेस्टब्रोमलाई ३-० ले पराजित गरेको हो । एभरटनले टोटनहमलाई १–० ले पराजित गर्दै लिगमा सुखद सुरुवात गरेको छ ।
वेस्ट ब्रुमको मैदानमा लेष्टरलाई जित दिलाउन जेमी भार्डीले दुई गोल गरे । यस्तै टिमोथी कास्टाग्नेले एक गोल गरे । जितसँगै लेष्टरले पहिलो खेलमै महत्वपूर्ण ३ अंक जोडेको छ । लेष्टर तालिकाको शीर्ष स्थानमा रहेको छ ।
यसैगरी अर्को खेलमा टोटनहम एभर्टनसँग पराजित भएको छ । आइतबार राती घरेलु मैदानमा भएको खेलमा टोटनहम एभर्टनसँग १–० गोलले पराजित भएको हो ।
पाहुना टोली एभर्टनलाई जित दिलाउन खेलको एक मात्र निर्णायक गोल डोमिनिक कल्भेर्ट लेबिनले गरे । उनले खेलको ५५ औं मिनेटमा गोल गर्दै एभर्टनलाई जित दिलाए ।
