भोलिदेखि सवारी पास वितरण नगर्न गृह मन्त्रालयको निर्देशन
काठमाडौं, २८ साउन : गृह मन्त्रालयले बिहीबारदेखि सवारीसाधनका लागि उपलब्ध गराउँदै आएको पास वितरण नगर्न निर्देशन दिएको छ ।
गृह मन्त्रालयले ७७ वटै जिल्ला प्रशासन कार्यालयलाई सवारी पास वितरण बन्द गर्न निर्देशन दिएको छ ।
गृहले बुधबार एक सूचना जारी गर्दै कोरोना संक्रमणलाई मध्यनजर गर्दै अर्को व्यवस्था नभएसम्मका लागि साउन २९ गतेदेखि सवारीसाधन पास उपलब्ध नगराउन निर्देशन जारी गरेको हो ।
गृहमन्त्रालयद्वारा सबै जिल्ला प्रशासनलाई दिइएकाे निर्देशनमा भनिएको छ ‘कोभिड १९ को जोखिमलाई मध्यनजर गर्दै अर्को व्यवस्था नहुन्जेलसम्मका लागि सवारी पास वितरण नगर्न, नगराउनुहुन आदेशअनुसार अनुरोध छ।’
यसअघि विभिन्न जिल्लामा अन्तर-जिल्ला सवारीसाधन सञ्चालनका लागि पास उपलब्ध गराइँदै आएको थियो ।
सरकार साउन ५ गतेबाट १२० दिन लामो लकडाउन अन्त्यको घोषणा गरेपछि कोरोना सक्रमण ह्वात्तै बढेको छ ।
अहिलेसम्म नेपालमा कुल संक्रमितको संख्या २४ हजार ४३२ पुगेको छ । त्यस मध्ये ९२ जनाको मृत्यु भएको छ भने १६ हजार ७२८ जना निको भएर घर फर्किएका छन् ।
पछिल्लो समय कोरोना भाइरसको संक्रमण तीव्ररुपमा वृद्धि हुन थालेपछि उक्त पास वितरण कार्य रोकिएको हो ।
