गण्डकीका मुख्यमन्त्रीले पाए विश्वासको मत
पोखरा, ४ असार : गण्डकीका मुख्यमन्त्री कृष्णचन्द्र नेपाली पोखरेलले विश्वासको मत प्राप्त गरेका छन् ।
गण्डकी प्रदेशसभामा विश्वासको मतमाथिको प्रस्तावमाथि भएको मतदानमा उनले ३१ मत प्राप्त गरे । जुन सरकार बनाउन आवश्यक मतभन्दा १ मत बढी हो ।
राष्ट्रिय जनमोर्चाका सांसद कृष्ण थापा गत सोमबार सर्वोच्चले पदमुक्त गरेपछि गण्डकीको सांसद संख्या ५९ कायम भएको थियो । सांसद संख्या ५९ भएपछि सरकार जोगाउन ३० मत भएपनि पुग्छ ।
गत शनिबार संविधानको धारा १६८(५) अनुसार नियुक्त भएका मुख्यमन्त्री पोखरेलले ३१ मत पाए । उनले काङ्ग्रेसका १५, माओवादी केद्रको ११, राष्ट्रिय जनमोर्चा र जनता समाजवादीको २/२ तथा स्वतन्त्र निर्वाचित राजीव गुरुङ (दीपक मनाङेको) १ मत पाएका हुन ।
प्रतिपक्षमा रहेको एमालेले भने विश्वासको मतको विपक्षमा मतदान गर्यो । विपक्षमा २७ मत पर्यो । गण्डकी प्रदेशसभामा ५८ जना सांसद मतदानमा सहभागी थिए ।
५९ सदस्यीय प्रदेशसभामा विश्वासको मत पाउन ३० मत आवश्यक पर्छ । प्रदेशसभामा विपक्षी दल एमालेको २७, नेपाली कांग्रेसको १५, माओवादी केन्द्रको सभामुखसहित १२, राष्ट्रिय जनमोर्चाको २, जनता समाजवादी पार्टीको २ सांसद छन् भने एक जना स्वतन्त्र सांसद छन् ।
राष्ट्रिय जनमोर्चाबाट निर्वाचित भएका सांसद कृष्ण थापालाई भने उनको दलले निष्कासन गरेका कारण पदमुक्त भएका छन् ।
