नेकपा कर्णाली प्रदेश प्रमुख सचेतकमा शाह
सुर्खेत, १८ फागुन : नेपाल कम्युनिष्ट पार्टी (नेकपा) कर्णाली प्रदेशसभा संसदीय दलको प्रमुख सचेतकमा प्रदेशसभा सदस्य गुलाबजंग शाह नियुक्त हुनुभएको छ ।
कर्णाली प्रदेश सरकारका मुख्यमन्त्री तथा नेकपा कर्णाली प्रदेश संसदीय दलका नेता महेन्द्रबहादुर शाहीले शाहलाई प्रमुख सचेतकमा नियुक्ति गर्नुभएको हो । दलको सचेतकमा प्रदेशसभा सदस्य सीता नेपालीलाई नियुक्ति दिइएको दलका नेतासमेत रहनुभएका मुख्यमन्त्री शाहीले बताउनुभयो ।
प्रमुख सचेतक शाह नियुक्त शाह वनगाड कुपिण्डे नगरपालिका– ६ सल्यान निवासी हुनुहुन्छ । उहाँ विसं २०७४ को प्रदेशसभाको चुनावमा सल्यान जिल्लाको प्रदेश ‘क’ बाट निर्वाचित हुनुभएको थियो ।
सचेतकमा नियुक्त प्रदेशसभा सदस्य नेपाली लेकबेँसी नगरपालिका सुर्खेत निवासी हुनुहुन्छ । उहाँ सुर्खेत निर्वाचन क्षेत्र नं १ बाट निर्वाचित हुनुभएको थियो । प्रमुख सचेतक र सचेतक दुवैलाई नेकपा संसदीय दलको आज बसेको बैठकले चयन गरेको हो ।
