एक अर्ब ७५ करोड राजस्व छलि आरोपमा मद्धा दायर
ललितपुर, २१ फागुन : राजश्व अनुसन्धान विभागले झुट्टा तथा नक्कली बिजक बिक्री गरी राजश्व छलिमा संलग्न मुख्य दुई आरोपीमाथि रु एक अर्ब ७५ करोड बिगो कायम गरी जिल्ला अदालत काठमाडौँमा मुद्दा दायर गरेको छ ।
विभागले उक्त नक्कली बिल बिजक बिक्री गरेको आरोपमा जयकिशोर साह र परमेश्वर साहलाई पक्राउसमेत गरेको छ । उनीहरुले बिक्री गरेका नक्कली बिजकका कारण भएको राजश्वबापतको रु एक अर्ब ७५ करोड बिगो दाबी गरिएको छ । नक्कली बिल बिजकमा संलग्न २४ फर्ममाथि समेत कारबाही गरिएको छ ।
विभागका महानिर्देशक दीर्घराज मैनालीले विभागमा आयोजित पत्रकार सम्मेलनमा बिल बिजक बेचेरै मुख्य प्रतिवादीहरुले काठमाडौँको मुख्य स्थानमा घर बनाएको बताउनुभयो । उहाँले भन्नुभयो, “फर्महरुका कारण कूल कारोबारको ३८ प्रतिशतसम्म राजश्व छलि भएको छ जसमा भ्याट बापतको १३ प्रतिशत र आयकर बापतको २५ प्रतिशत मात्र समावेश छ, तर भन्सारसमेत छलेको भए राजश्व हिनामिनाको अङ्क अझ ठूलो हुनसक्छ ।”
उहाँका अनुसार कम्पनी रजिष्ट्रारको कार्यालयमा कामदारको नाममा कम्पनी दर्ता गर्ने, आन्तरिक राजश्व कार्यालयबाट भ्याट दर्ता गर्ने र अर्को दिन बैंकमा खाता खोल्ने गरेको अनुसन्धानबाट खुलेको छ । मुख्य आरोपी जयकिशोर र परमेश्वरले कम्पनी खोलेसँगै लगत्तै प्रिन्टिङ प्रेसबाट भ्याट बिल छाप्ने र बजारमा बिक्री गर्ने गरेको खुलेको बताइएको छ ।
उक्त बिलहरु साना फर्महरुदेखि आपूर्तिकर्ता, निर्माण व्यवसायी, अर्को कम्पनीलगायतलाई बिक्री गरिने गरेको जनाइएको छ । यस्ता बिलको सहायताबाट फर्महरुले प्रत्यक्ष रुपमा मूल्य अभिवृद्धि कर र आयकर छल्न सहयोग पुगेको उहाँले बताउनुभयो ।
निम्नस्तरका मजदुरहरुलाई आर्थिक प्रलोभनमा पारी तिनीहरुको नाममा फर्म कम्पनी खोल्ने गरेको पनि अनुसन्धानबाट थाहा लागेको विभागको भनाइ छ । विभागका अनुसार, फर्मको खाता सञ्चालन तिनै मजदुर वा नक्कली बिलको कारोबार गर्ने व्यक्तिले आफूलाई कर्मचारीको रुपमा प्रस्तुत गरी दुवै जनाको दस्तखत कार्ड पेश गर्ने र कुनै एक जनाको दस्तखतबाट बैंक कारोबार गर्ने गरेको पाइयो ।
विभागका महानिर्देशक मैनालीले भन्नुभयो, “अनुसन्धानबाट यसको व्यापकता र विकराल रुपमा कर छलिको गम्भीर अवस्था छ भन्नेमा विभाग पुगेको छ ।” विभागले सो प्रकरणका मुख्य दोषी परमेश्वरलाई गत माघ ३ गते र जयकिशोरलाई गत माघ ४ गते पक्राउ गरेको थियो ।
