सत्तारुढ नेकपाको केन्द्रीय कमिटी बैठक स्थगित
काठमाडौं, १२ कात्तिक : सत्तारुढ नेपाल कम्युनिष्ट पार्टी (नेकपा) को केन्द्रीय कमिटी बैठक फेरि स्थगित भएको छ । कात्तिक १५ देखि १७ गतेसम्म काठमाडौंमा बस्ने भनिएको केन्द्रीय कमिटी बैठक मंसिर १५ सम्मलाई स्थगित भएको हो ।
तयारी नपुगेको भन्दै सत्तारुढ दल नेपाल कम्युनिस्ट पार्टी (नेकपा) को पूर्व निर्धारित केन्द्रीय समिति बैठक एक महिनापछि सारिएको छ । कात्तिक १५ देखि १७ गतेसम्म बस्ने निर्धारण भएको बैठक गृहकार्य नपुगेकाले एक महिना पछि घकेलिएको हो ।
पार्टीमा देखिएको आन्तरिक कलह बढ्दै गएका बेला नेकपा केन्द्रीय कमिटी बैठक स्थगित भएको हो । यो बैठक अब मंसिर १५ देखि १७ गतेसम्मका लागि सारिएको नेकपा कार्यालय सचिवद्वय श्रीराम ढकाल र ईश्वरी रिजालले विज्ञप्तिमार्फत जनाएका छन् ।
पार्टी केन्द्रीय कार्यालयले बैठक स्थगितको कारण कोरोना भाइरस संकट भनेको छ । ‘कात्तिक १५ देखि १७ सम्मलाई आयोजना गरिएको पार्टी केन्द्रीय कमिटीको तेस्रो पूर्ण बैठक कोभिड-१९ महामारीको बढ्दो प्रकोपका कारण हाललाई स्थगित गरिएको छ’, विज्ञप्तिमा भनिएको छ, ‘स्थगित बैठक यही मंसिर १५ देखि १७ गतेसम्मलाई आयोजना गरिएको छ ।’
