उद्घाटन खेलमा चितवन टाइगर्स विजयी
काठमाडौँ, १३ असोज : नेपाल भलिबल सङ्घ र भारतको आधिअवाधी फाउन्डेसनको आयोजनामा आजदेखि यहाँ महिला भलिबल प्रतियोगिता शुरु भएको छ । उद्घाटन खेलमा चितवन टाइगर्स विजयी भएको छ ।
लिग चरणको पहिलो खेलमा चितवनले त्रिभुवन आर्मी क्लबलाई ३–० को सोझो सेटमा पराजित गरेको हो । त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा भएको सो खेलमा चितवनले आर्मीविरुद्ध २५–२१, २५–१३ र २५–२२ अङ्कको जित निकालेको हो ।
यही असोज १७ गतेसम्म सञ्चालन हुने उक्त प्रतियोगितामा न्यू डायमण्ड, चितवन टाइगर्स, त्रिभुवन आर्मी क्लब, सशस्त्र प्रहरीको एपिएफ क्लब, नेपाल पुलिस क्लब र पोखरा पिङ्केजको सहभागिता रहेको नेपाल भलिबल सङ्घका महासचिव जितेन्द्रबहादुर चन्दले जानकारी दिनुभयो ।
प्रतियोगिताको विजेताले रु ६ लाख, उपविजेताले रु तीन लाख तथा तेस्रो हुनेले रु एक लाख ५० हजार पुरस्कार प्राप्त गर्नेछन् । प्रतियोगिताको उत्कृष्ट खेलाडीलाई एक थान स्कुटर तथा रु ५० हजार पुरस्कार दिइनेछ ।
