रियल म्याड्रिडसँगको दुरी ४ अंकमा झार्न बार्सिलोना सफल
काठमाडौं, २२ असार : भिल्लेरियालमाथि ४–१ को जीत निकाल्दै बार्सिलोनाले ला लिगाको उपाधि जित्ने सम्भावनालाई कायम राखेको छ ।
जीतसँगै बार्सिलोनाले शीर्ष स्थानमा रहेको रियल म्याड्रिडसँगको दुरी ४ अंकमा झार्न सफल भएको हो ।
खेलमा बार्सिलोनाले पाउ टोरेसको आत्मघाती गोलको मद्दतले अग्रता लिएको थियो । तर, लगत्तै जेरार्ड मोरेनोले भिल्लेरियालका लागि बराबरी गोल फर्काएका थिए । खेलको २० औँ मिनेटमा लियोनेल मेस्सीको पासमा लुइस सुवारेजले बार्सिलोनालाई पुनः अग्रता दिलाए । पहिलो हाफको अन्त्यमा मेस्सीले पुनः एन्टोनियो ग्रिजमानका लागि गोलको अवसर सिर्जना गरे । अन्सु फातीले बार्साका लागि चौथो गोल गरे ।
चार खेल बाँकी छँदा रियल म्याड्रिडभन्दा बार्सिलोना ४ अंकले पछि रहेको छ । ३४ खेलबाट बार्सिलोनाको ७३ अंक रहेको छ भने रियलको ७७ अंक रहेको छ ।
यसअघि रियल म्याड्रिडले एथ्लेटिक बिल्बाओलाई संघर्षपूर्ण खेलमा १–० गोलअन्तरले पराजित गरेको थियो । खेलमा एक मात्र गोल कप्तान सर्जियो रामोशले गरेका थिए ।
खेलको ७३ औँ मिनेटमा पेनाल्टीमार्फत गोल गर्दै उनले रियललाई महत्त्वपूर्ण तीन अंक दिलाए । उनले स्पेन र रियलका लागि लगातार २२ पेनाल्टीलाई गोलमा परिणत गरेका छन् ।
कोरोनाको महामारीपछि लिग पुनः सुचारु भए यता रामोशले सात खेलमा पाँच गोल गरेका छन् जसमा रियलले सबै खेलमा जीत हासिल गरेको छ ।
यता, रियलका लागि गोलकिपर थियाबट कोर्टवा एकै सिजनमा १७ वटा क्लिन सिट राख्ने सन् १९९४–९५ मा फ्रान्सिस्को बुयोपछि पहिलो गोलकिपर बनेका छन् ।
अब बाँकी चार मध्ये तीन खेलमा जीत हासिल गरे रियलले सन् २०१२ पछि पहिलो लिग उपाधि जित्नेछ ।
