अवैध मदिरा नियन्त्रणमा
अत्तरिया, २४ वैशाख: कैलालीमा ठूलो परिमाणमा मदिरा बरामद गरिएको छ ।
लकडाउन अवधिमा कैलालीको टीकापुर नगरपालिका र जानकी गाउँपालिकाका विभिन्न वडाबाट मदिरा बरामद गरिएको इलाका प्रहरी कार्यालय टीकापुरका प्रहरी नायब उपरीक्षक मनोहरप्रसाद भट्टले बताउनुभयो ।
प्रहरीले गस्ती गर्दै जाने क्रममा बेवारिसे अवस्थामा फेला पारेको सिल प्याक एक हजार २६२ बोतल र छ हजार ८०० लिटर घरेलु मदिरा बरामद गरिएको उहाँले बताउनुभयो । टीकापुर नगरपालिका नगरप्रमुख, इलाका प्रशासन कार्यालय टीकापुरका प्रमुख, टीकापुर उद्योग वाणिज्य सङ्घका पदाधिकारीलगायतको रोहबरमा बुधबार बरामद गरिएको घरेलु मदिरा नष्ट गरिएको प्रहरी नायब उपरीक्षक भट्टले बताउनुभयो ।
बरामद गरिएको सिल प्याक मदिरा भने नियमानुसार करदाता सेवा कार्यालय लम्की कैलालीमा पठाइएको जनाइएको छ ।
