बस दुर्घटनामा मृत्यु भएका १७ मध्ये १४ को सनाखत, ४७ घाइते (नामावलीसहित), तीव्रगति र बढी लोडका कारण दुर्घटना 

देवराज सुवेदी । मेलम्ची, १७ कात्तिक : अरनिको राजमार्गअन्तर्गत सुकुटेमा भएको बस दुर्घटनामा मृत्यु हुनेको सङ्ख्या १७ मध्ये १४ को सनाखत भएको छ ।

दोलखाको मुडे देउरालीबाट काठमाडौँका लागि छुटेको बा२ख ७२४५ नम्बरको यात्रुबाहक बस सुनकोशी नदीमा खस्दा मृत्यु भएकाको सनाखत भएको प्रहरीले जनाएको छ ।

प्रहरीका अनुसार मृतक १७ मध्ये १० महिला, एक बालिका र पाँच पुरुषमा तीन बालक रहेका छन् । जिल्ला प्रहरी कार्यालय सिन्धुपाल्चोकका प्रहरी नायब उपरीक्षक माधवप्रसाद काफ्लेका अनुसार सनाखत भएकाहरुमा मृत्यु हुनेमा दोलखा जिल्ला शैलुङ–६ की ५२ वर्षीया चेतकुमारी बस्नेत, शैलुङ–४ का छ वर्षीया सलिना तामाङ, शैलुङ–३ का तीन महिनाका बालक रोशन तामाङ, शैलुङ–३ कै २७ वर्षीया चमेली श्रेष्ठ रहेकी छिन् ।

त्यसैगरी ४५ वर्षीया रत्नकुमारी रावत, २९ वर्षीय किरण रावत, २० वर्र्षीया कविता रावत र १४ वर्षीय निखिल खड्का शैलुङ–५ का रहेका छन् । शैलुङ–४ का १४ वर्र्षीय दिल लामा, शैलुङ–३ का ३२ वर्षीया निर्मला खड्का, काभ्रेपलाञ्चोक रोशी–४ की पाँच वर्षीया सजिना तामाङ, दोलखाका ७० वर्षीया उरमाया तामाङ र भीमेश्वर नगरपालिका–९ की २४ वर्षीया रञ्जिता केसीको पनि मृत्यु भएको छ ।

त्यस्तै सिन्धुपाल्चोक त्रिपुरा सुन्दरी–४ की छ वर्षीया माया श्रेष्ठ र तीन जना बालकको भने पहिचान खुल्न बाँकी रहेको प्रहरीले जनाएको छ ।

दुर्घटनामा परेकाको उद्धारका लागि नेपाल प्रहरी, सशस्त्र प्रहरी र स्थानीयवासी खटिरहेका छन् । नदीमा डुबेको बसलाई क्रेनको सहयोगले बाहिर निकालिए पनि बसभित्र कोही नभेटिएको प्रहरीको भनाइ छ । यात्रु सबै बगाएको अनुमान गरिएकाले मृतक सङ्ख्या अझै बढ्न सक्ने अनुमान छ ।

केही शवहरु खोलाले बगाएको अनुमान गरिएको छ । बस सडकबाट ३५ मिटर तल खसेर सुनकोशी नदीमा पुगेको थियो । बसमा ४० बढी सवार रहेका थिए । सिन्धुपाल्चोकको स्थानीय अस्पताल खाडीचौरमा २० जनाको उपचार भइरहेको छ । त्यस्तै प्राथमिक स्वास्थ्य केन्द्र दोलालघाटमा पनि घाइतेको उपचार भइरहेको छ । गम्भीर घाइतेलाई काठमाडौँ लगिएको सशस्त्र प्रहरीका प्रहरी नायब निरीक्षक भुपाल खत्रीले जानकारी दिनुभयो ।

जिल्ला प्रहरी कार्यालय सिन्धुपाल्चोकका प्रहरी नायब निरीक्षक काफ्लेका अनुसार दुर्घटना ठूलो भएकाले क्षति बढ्न सक्नेछ । उहाँले अहिले पनि उद्धारकार्य जारी रहेको जानकारी दिनुभयो ।

घाइतेहरूको नामावली    

दुर्घटनामा निशा तामाङ, एकरानी कार्की, छत्रकुमारी थापा, सुनिल थापा जीवन खड्का, समीर श्रेष्ठ, मिनकुमार श्रेष्ठ, सङ्गीता श्रेष्ठ, जेनिशा श्रेष्ठ, सदीक्षा कार्की, सुरेश तामाङ, सहनशीला घिसिङ र कौशिला कार्की रहेको प्रहरीले जनाएको छ ।

प्रविन आलेमगर, बबिता श्रेष्ठ, कोपिला कार्की, हरिमाया थापा, सीमा कार्की, युनिसा खड्का, मनिका खड्का, कमला मोक्तान, डोल्मा तमाङ, श्रीकृष्ण कार्की, शिशिर तामाङ र सुनिता तमाङ घाइते भएका छन् ।

त्यसैगरी शसीता तामाङ, युनिसा तामाङ, रश्मी बस्नेत, सविता थापा, निरक श्रेष्ठ, रविन मोक्तान, निकेश श्रेष्ठ, रञ्जना केसी, सरिता तमाङ, जीतबहादुर खड्का र लोकबहादुर थापा, रोमन तिमल्सिना, विमला तामाङ, दीपा घिसिङ, रोमा घिसिङ, सुजन तामाङ, गोमा श्रेष्ठ र सुकमान विक रहेका छन् । घाइते ४७ जनामध्ये ४७ तीन जनाको नाम खुल्न सकेको छैन ।

दुर्घटनामा परी घाइते भएकाको धुलिखेल अस्पतालमा उपचार हुँदै

सिन्धुपाल्चोकको सुकुटेमा आज दिउँसो भएको यात्रुवाहक बस दुर्घटनामा परी घाइते भएकाको धुलिखेलस्थित धुलिखेल सामुदायिक अस्पताल र बनेपास्थित शिरमेमोरियल अस्पतालमा उपचार भइरहेको छ । दोलखाको मुडे देउरालीबाट काठमाडौँका लागि छुटेको बा२ख ७२४५ नंको बस चौतारा साँगाचोकगढी नगरपालिका वडा नं ९ अरनिको राजमार्गस्थित सुकुटेमा दुर्घटना हुँदा बस सुनकोशी नदीमा खसेको थियो ।

सो दुर्घटनामा परी घाइते भई धुलिखेल अस्पतालमा उपचार भइरहेको ४८ जनामध्ये एक जनाको उपचारका क्रममा मृत्यु भएको प्रहरीले जनाएको छ । जिल्ला प्रहरी कार्यालय काभ्रेपलाञ्चोकका प्रहरी नायब उपरीक्षक दीपक गिरीका अनुसार धुलिखेल अस्पतालमा उपचार भइरहेकामध्ये १४ जना उपचारपश्चात् घर फर्किसकेको र चार जनालाई थप उपचारका लागि काठमाडाँै पठाइसकेको छ ।

मृत्यु हुनेमा दोलखा जिल्ला शैलुङ्गेश्वरी गाउँपालिका–५ की ५२ वर्षीया चेतकुमारी बस्नेत रहेको प्रहरीले जनाएको छ । त्यस्तै घाइतेमध्ये तीन जनाको बनेपास्थित शिरमेमोरियल अस्पतालमा उपचार भइरहेकामा एक जनाको मृत्यु भएको प्रहरीले जनाएको छ । मृत्यु हुनेमा दोलखा जिल्ला शैलुङ गाउँपालिका वडा नं ४ का छ वर्षीया सलिना तामाङ रहेका छन् । घाइतेका अनुसार भैँसेमा खाना खाएपछि गुडेको गाडी तीव्र गतिमा रहेको र सुकुटेमा आइपुगेपछि गाडी बल्ड्याङ खाएर नदीमा खसेको थियो ।

तीव्रगति र बढी लोडका कारण दुर्घटना    

सो गाडीमा यात्रारत रहेका घाइतेका अनुसार क्षमताभन्दा बढी लोड गाडी तीव्रगतिमा चलाएका कारण अनियन्त्रित भएर दुर्घटना भएको हो । सुनकोशी गाउँपालिका–६ सानुपाखरका घाइेत लोकबहादुर थापाका अनुसार भैँसेमा खाना खाएपछि गाडी एकदम तीव्रगतिमा गुडाएको थियो । यता सुकुटे आइसकेपछि घुम्ती जस्तो ठाउँमा एकपटक घटक्क गरेको आवाज सुन्नेबित्तिकै एकैचोटी बल्ड्याङ खाएर गुल्टेको उहाँले बताउनुभयो ।

“गाडी एक्कासी गुल्टेपछि नदीमा डुब्यो । म चाहिँ सिट पन्छाएर बाहिर निस्केपछि पाँच जनाजति महिला र पाँच जना बच्चालाई तानेर निकालँे । त्यसपछि आफैँ श्वास फेर्न नसकेपछि फर्केर हेर्दा आफ्नै बूढी पनि छट्पटिएर बसेको रहेछ”, उहाँले भन्नुभयो, “बल्लबल्ल उनलाई तानेर बाहिर ल्याएर माथि आएपछि ट्रकमा चढेर अस्पताल आएको हुँ ।”

घाइते भेट्न जनप्रतिनिधि अस्पतालमा    

दुर्घटनामा परी घाइते भएकाको अवस्था बुझ्न दोलखाका जनप्रतिनिधि धुलिखेलस्थित अस्पतालमा आइपुग्नुभएको छ ।

अस्पतालमा उपचार गराइरहेको घाइतेहरुको अवस्था बुझ्न दोलखाका पूर्वपर्यटनमन्त्री आनन्द पोख्रेल, सङ्घीय सांसद पार्वत गुरुङ र शैलुङ गाउँपालिका वडा नं ५ का वडा अध्यक्ष किरण बस्नेत लगायतले घाइतेको उपचारमा सहज बनाउन र आवश्यक व्यवस्थापनका लागि सहयोग भइरहेको बताउनुभयो । पूर्वमन्त्री आनन्द पोख्रेलले घटनामा घाइते भएकाका उपचारमा अस्पताल व्यवस्थापनपक्षसँग र अरनिको यातायातसँग पनि कुरा गरिसकेको बताउनुभयो ।

दोलखा जिल्लाबाट सङ्घीय सांसद पार्वत गुरुङले घाइतेहरुको उपचारका लागि आवश्यक व्यवस्थापनका लागि पहल भइरहेको बताउनुभयो । घाइतेको उद्धार र निःशुल्क उपचारको व्यवस्थाका निम्ति लागिरहेको उहाँको भनाइ छ ।

शैलुङ गाउँपालिका वडा नं ५ का वडाध्यक्ष किरण बस्नेतले यातायात प्रालीले दुर्घटनाप्रति बेवास्ता गरेको बताउनुभयो । एकातिर घाइते धेरै भएकाले अस्पतालमा उपचारमा समस्या हुनु र अर्काेतिर समितिका कुनै पनि मान्छे घटना घटेको चार घण्टा बितिसक्दासमेत कोही कसैले अवस्था बुझ्न नआएको उहाँले बताउनुभयो ।