एनआरएनए खेलाडीको सहभागिता निश्चित
काठमाडौँ, १ फागुन : प्रदेश नं ५ मा हुने आठौँ राष्ट्रिय खेलकूदमा गैरआवासीय नेपाली सङ्घका (एनआरएनए ) खेलाडीको सहभागिता निश्चित भएको छ ।
सोसम्बन्धी सम्झौतापत्रमा राष्ट्रिय खेलकूद परिषद् (राखेप) का सदस्य सचिव केशवकुमार विष्ट र एनआरएनएका अध्यक्ष भवन भट्टबीच सम्झौतापत्रमा हस्ताक्षर भएको छ । एनआरएनएको आधिकारिक प्रतिनिधिको सिफारिशमा मात्र एनआरएन खेलाडीले आठौँ राष्ट्रिय खेलकूदमा सहभागिता जनाउन पाउने सम्झौतामा उल्लेख भएको राखेपले जनाएको छ ।
सुविधाको हकमा नेपालमा रहँदा प्रतियोगिता अवधिभर अन्य खेलाडीलाई दिने सुविधा एनआरएनका खेलाडीलाई उपलब्ध गराइने सम्झौतामा उल्लेख छ । सम्बन्धित देशबाट आउने जाने खर्च राखेपले व्यहोर्ने छैन ।
वृहत राष्ट्रिय खेलकूदको इतिहासमा एनआरएनका खेलाडी पहिलो पटक सहभागी हुन लागेको हो । उनीहरुले खेलाडीले व्यक्तिगत स्पर्धामा मात्र सहभागिता जनाउन पाउने छन् ।
