एसएसपी राणालाई डिआइजीमा बढुवा गर्न सिफारिस
काठमाडौं, ७ साउन : गृह मन्त्रालयले प्रहरी वरिष्ठ उपरीक्षक (एसएसपी) शौरभ राणालाई प्रहरी नायब महानिरीक्षक (डिआइजी) पदमा पदोन्नति गर्न सिफारिस गरेको छ ।
बिहीबार मन्त्रालयमा बसेको बढुवा समितिको बैठकले राणालाई बढुवा गर्न सिफारिस गरेको हो । प्रहरी महानिरीक्षक शैलेश थापाका ब्याजी राणालाई बढुवा सिफारिस गरिएको हो ।
डीआईजी सहकुल बहादुर थापाको एआईजीमा बढुवा भएपछि रिक्त दरबन्दीमा राणालाई बढुवा सिफारिस गरिएको मन्त्रालयले जनाएको छ । एक वर्षअघि धरानकी एक महिलालाई बलात्कार गरेको आरोपमा पक्राउ परेका राणा सुनसरी जिल्ला अदालतबाट हाजिरी जमानीमा छुटेका हुन् ।
यस्तै नेपाल प्रहरी अस्पताल महाराजगञ्जमा कार्यरत प्रहरी उपरीक्षक छायाँ देवी गुरुङलाई प्रहरी बरिष्ठ उपरीक्षकमा बढुवाका लागि सिफारिस गरिएको छ ।
नेपाल प्रहरीमा प्राविधिक प्रहरी समूह, स्वास्थ्य उपसमूह नर्सिङतर्फको प्रहरी बरिष्ठ उपरीक्षक पदमा प्रहरी उपरीक्षक रहेकी गुरुङलाई बढुवाका लागि सिफारिस गरिएको बढुवा समितिका सदस्य सचिव निरजबहादुर शाहीले जानकारी दिए ।
त्यस्तै, सोही अस्पतालमा कार्यरत प्रहरी नायब उपरीक्षक रामेश्वर अधिकारीलाई पनि प्रहरी उपरीक्षक पदमा बढुवाका लागि सिफारिस गरिएको छ ।
