प्रदेश नं १ को राजधानी तोक्ने विषयमा चार प्रस्ताव दर्ता
प्रदेशको नामका विषयमा कुनै पनि प्रस्ताव नआए पनि स्थायी राजधानीका लागि नेपाल कम्युनिष्ट पार्टी(नेकपा)का तर्फबाट प्रदेशसभा सदस्य बुद्धिकुमार राजभण्डारी प्रस्तावक र समर्थक लिलम बस्नेत, विजयकुमार ओझा, सावित्रा रेग्मी र यशोदा अधिकारीले विराटनगर राजधानी हुनुपर्ने प्रस्ताव दर्ता गराउनुभएको छ । विराटनगरकै लागि नेपाली काङ्ग्रेसका तर्फबाट प्रदेशसभा सदस्य केदार कार्की प्रस्तावमा शिवनारायण गनगाँई, विन्दीय कार्की र जयराम यादवले समर्थक जनाउनुभएको छ ।
धनकुटा राजधानीको बनाउन प्रदेशसभा सदस्य लीला सुब्बाको प्रस्तावमा प्रतापप्रकाश हाङ्गाम र रामचन्द्र लिम्बू तथा धनकुटाकै लागि निरन राईको प्रस्तावमा सदस्य इन्द्रमणि पराजुली र सदस्य कुसुमकुमारी श्रेष्ठले समर्थन गर्नुभएको छ ।
प्रदेशसभाको राजधानीका विषयमा आज बसेको सर्वदलीय बैठकमा सत्तापक्षको प्रस्ताव प्रदेश नं १ को राजधानी विराटनगर नै हुने र कार्यपालिक तथा व्यवस्थापिकको संरचना बृहत् विराट विकास क्षेत्रअन्तर्गत विराटनगर, इटहरी र सुन्दर हरैचाको आसपासमा निर्माण हुने विषयमा नेपाली काङ्ग्रेसले असहमति जनाएको थियो । नेपाली काङ्ग्रेसले प्रदेशको राजधानी विराटनगर नै हुनुपर्ने बृहत् विराट विकास क्षेत्र शब्द हटाउनुपर्ने माग राखेका थिए ।